تۆم هه‌ر له بیره
له شایی دا له وه‌ختی هه‌ڵپه‌ڕین دا
له خۆشی دا له کاتی پێکه‌نین دا
له کۆڕی ماته‌م و گریان و شین دا
ئه‌من ئه‌ی نیشتمان تۆم هه‌ر له بیره
به شه‌و تاکوو به سه‌رما زاڵ ده‌بێ خه‌و
به ڕۆژ تاکوو دووباره دێته‌وه شه‌و
له کاتێک دا که ده‌دوێنم ئه‌م و ئه‌و
ئه‌من ئه‌ی نیشتمان تۆم هه‌ر له بیره
زه‌مانێکی که ده‌چمه سه‌یری گوڵزار
له گه‌ڵ پۆلی ڕه‌فیقانی وه‌فادار
ته‌نانه‌ت وه‌ختی ده‌سبازی له‌گه‌ڵ یار
ئه‌من ئه‌ی نیشتمان تۆم هه‌ر له بیره
له کوێستانێ ده‌می ڕاو و شکارێ
له مه‌زرایه که خۆم هه‌ڵکرد له کارێ
له جێ ژوانێ که ده‌گوشم مه‌مکی یارێ
ئه‌من ئه‌ی نیشتمان تۆم هه‌ر له بیره
ده‌که‌م ته‌رخان له ڕێی تۆ دا ژیانم
له سه‌نگه‌ر دا به‌ره‌و ڕووی دوژمنانم
به خاکی تۆ ده‌می ئاویلکه‌دانم
ئه‌من ئه‌ی نیشتمان تۆم هه‌ر له بیره
هیمن
شیلاناوێ ـ 1944
ورود کاربران
خوش آمدید! لطفا وارد حساب خود شوید